- МАРИА
- Хуыцауы хæрæфырт. Йамоны дыккаг ус, Амраны мад. Цæры Саухохы. Ахæм хæдзары, йæ бын æргъæу кæмæн у, иæ фæрстæ — цъæх авг, йæ сæр — сæууон стъалы. Мариа хуыссы пылыстæг сынтæгыл, сыгъзæрин чыргъæды — йæ дзыккутæ, болат хæсгард — сæ уæлæ. Йæ разы хæдзилгæ уæхстытæ артмæ зилынц æмæ фыцынц. Ахæм хуызы йæ баййæфта Йамон, Сау хохы саг куы рамардта æмæ талынджы, рухс кæцæй цыд, уый базоныны тыххæй йæ галуанмæ куы бафтыд, уæд.– Даредзанты Йамон, æз абонмæ дæумæ куы æнхъæлмæ кастæн, — бацин ыл кодта Мариа. — Мæнæн дæу йедтæмæ æндæр мой скæнæн куы нæ ис. Гъе ныр цæрдзыстæм Хуыцауы цардæй, кæд мыл баввæрсай, уæд.– Æз ныууагътон дыууæ сидзæр лæппуйы æмæ уыдон хъуамæ скæнон.– Уыдон кæд дзæбæх уой, уæд дæ агурдзысты сæхуыдтæг.Бадри æмæ Мысырби бон уыдисн рæзтысты, æхсæв та — уылынг, уайтагъд айрæзтысты æмæ æцæгдæр бацагуырдтой сæ фыды. Ссардтой йæ къулбадæг усы амындæй. Йамон та кæркуасæнты цуаны куы рараст æмæ сæ хæдзары æфсæн дуар куы бакодта, уæд сæ куыд нæ федтаид, афтæ йæ иувæрсты мидæмæ багæппытæ кодтой. Хуыцауы хæрæфырт сыгъзæрин сынтæджы хуыссы, сыгъзæрин чыргъæды йæ дзыккутæ, болат хæсгард — сæ уæлæ. Уымæн уыд дзыккутæй йæ мæлæт. Бадри фæхæцыд дзыккутыл, Мысырби сыл хæсгард февæрдта æмæ сæ атæхын кодта. Чызг ма ныцъцъæхахст ласта. Хохмæ фехъуыст йæ хъæр, æмæ Йамон æртæ гæппæн йæ уæлхъус февзæрд. Фæлæ уæдмæ Бадри æмæ Мысырби усы уым фæуагътой æмæ рафардæг сты сæхимæ.
Словарь по этнографии и мифологии осетин. 2014.
